1993

1993

Sujet: Em Bebbi schtinggt`s

Wenn am Morge frieh dr Wegger lytet,
denn waisch gnau, was das bedytet.
Uffschtoh muesch, s`isch nit mit pfuuse.
Bi däm Gedangge kunnt aim s`Gruuse
Im Schtolle duet scho d`Arbet wingge
Und dir foht`s langsam afoh schtingge.
Dr Schef, dä macht e suure Schtai.
Am liebschte gechtsch grad wieder hai!
Nur wär die Leesing au nit guet.
S`git no meh, wo ferdere duet Dy Wuet.

Nit nur am Arbetsblatz do glingt`s
as De mänggmol saisch: „Mir schtinggt`s!“

Wottsch in d`Schtadt e bitz flaniere,
duesch Dyni Närve schtrabaziere.
Gosch in d`Gärbergass go läädele.
Muesch um Lecher umewäädele.
Bim Aabligg vo däm Bauschutthuffe.
gechtsch am liebschte ain go suffe.
Noch eme Rundbligg triffsch Dy Wahl
Und suechsch dr s`bassend Bierlokal.
Fir das Verngniege dien dr d`Baizerheere
Kurzerhand Dy Gäldsagg leehre.

Als Bebbi saisch do druff:
„Mir schtinggt`s das macht mi muff!“

Nit nur in der Wält vom glaine Maa
Foht`s langsam afoh schtingge aa.
Hauptsächlig im politisch Lääbe
dien schlächti Gschmägger umeglääbe.
Bi Abschtimmige und Wahle
Git`s Lyt wo anschtatt ehrwirdig schtrahle.
Sich profiliere mien in ainer Pracht
Als Generäl in dr Schlammschlacht.
De frogsch Dy:“Was hänn die dervo,
die Heere Blocher oder so?“

Nit nur Clochards, au politisch Wääse
dient zytewiis ganz gruusig jääse!

Wirfsch e Bligg uff d`Schtaatsfinanze,
dien d`Myys im Ranze afoh danze.
Basel, als dr rych Kanton
Isch langsam schtyyr, es isch e Hohn.
Drum verfallt me denn in Schpaarhyschterie.
Frogsch Dy: “Hänn die im Grind Lischterie?“
Bim schpaaare gehen si iiber Lyche,
schpaare bi de Zahlryche schtatt bi de Ryche!
Dr Sinder ich, Du kasch es aahne,
dr glaini Birger nundefahne!

Dä Schpaargschmagg schtigt Dir scharf in Zingge,
so ebbis muess Dir aifach schtinggge!

Und luegsch emol in Nordde uffe.
Dert schtinggt e-n-andere grosse Huffe
Dr Gschmagg isch ähnlig wie vor 60 Joor
S`schtinggt schampar no dr Brune Gfohr.
Wenn Velker gege anderi hetze,
bluetrinschtig ihri Mäser wetze.
Dr Schädel sich dien kahl rasiere.
Im Glychschritt greelen dien marschiere
Und ihri Schpringerschtiefel trage.
Denn schlot`s gwaltig uff e Maage.

Vom Schwoobeland dä bruunni Gschtangg
Dä macht Di wirgglig langsam grangg!

Au in dr Wirtschaft, nit nur in Politigg
tribt me`s hytzertags ganz digg.
Gäld schtinggi nit, so hert me sage.
Doch blatzt au do Dir gly dr Krage.
Worum, so duesch Dy ärnschthaft frooge.
Git`s dunggli Gschtalte, wo`s dien wooge.
Ihr Gäld go zwäsche bi de Bangge.
Wo hinderdry dien schwär ergrangge
Am Drägg wo an däne Schtitz duet glääbe?
Du als Bebbi im ehrlig Lääbe.

Die Dräggschàft vo däne Mischtfingge
Dien scho lang zem Himmel schtingge!

E jeedi Clique s`isch normal,
hett fir iihre Grimpel e Lokal,
wo d`Fasnacht schloft so iiber`s Joohr
schtill fir sich, ganz ohni Gfohr.
Nur wenn`s em Huuswaart nimme basst.
Wird me-n-aifach uusegschasst.
S`muess alles wäg. Am bescht Gescht.
Dr Daifel fiehrt sy grosses Fescht.
So wird ain vom Clique Frind
Iiber Nacht zem Clique- Find

Schpielt ain esone miese Fingge.
Denn ka`s Dir wirgglig afoh schtingge

Es gäb no meh zem untersueche
Doch wurdsch gly lut afoh flueche.
Wenn Du merggsch wo`s iiberall duet jääsele
Schtingge. Schmegge. Gääsele
In Basel und uff dr ganze Wält. Breg und kurz
Viel schlimmer als vo dr Chemie e Furz.
Loos Bebbi. Mir dien Dir roote.
Heb d`Naase nit an dä suur Broote.
Sondern schtregg si ho in d`Basler Luft.
Denn schmeggsch en gly, dr Fanachtsduft!

Wenn d`Frau Fasncht Dir duet wingge
Denn duet`s Dir pletzlig nimme schtingge!