1995

Fasnacht 1995

 

Sujet: Ains, zwai, drei,
läng mer schnäll dr Spray!

 

In Basel schtehn vyl Hysli, in Basel schtehn vyl Baim,
in aim vo dääne Hysli bin au ych dehaim.
Die Hysli hän vyl Wändli
und z’Nacht dien Schtrolchehändli
verschandle als die Wändli
mit Filzschtift und mit Spray,
den gehn si wieder hai.

Ains, zwai, drei,
läng mer schnäll dr Spray!

In Basel schtehn vyl Hysli, in Basel schtehn vyl Baim,
am Morge ganz lysli, e Sprayerli kunnt haim.
Aer kunnt vo männgem Hysli, är kunnt vo männger Wand,
är kunnt haim vom Drämmli und vellig unerkannt.
Nur in syne Kraise, do isch är guet bekannt,
und findet syni „Tag“
e schampar guete „Gag“.

Ains, zwai, drei,
ych hane scheene Spray!

In Basel schtehn vyl Hyslim in Basel schtehn vyl Baim,
s’isch jo fascht wie friener, im Grund gno insgehaim.
In finschtere diefe Egge mit Aesche und mit Kohle
dien Heehlebewohner moole
und sich fascht iiberdroole,
was si so dääglig sehn
und findes wunderscheehn.

Ains, zwai, drei,
no sällmol ohni Spray.

In Basel schtehn vyl Hysli,m in Basel schtehn vyl Baim.
Wenn ych dängg an friener, an alti Kinderdraim,
wo bim Schtruwelpeter sälbmol d’Naarehändli
verschmieret als hän Disch und Wändli,
so kunnt’s mer vor, wie-n-e glai Brändli,
wo im Untergrund duet schweele
dief in männger Jugendseele.


Ains, zwai, drei,
s’isch alles gar nit nej.


In Basel schtehn vyl Hysli, in Basel schtehn vyl Baim.
Aber so als Huusbesitzer griegsch langsam beesi Draim!
Wenn an dym Huus, wo dy sell hiete,
z’Nacht dien wieschti Gselle wiete,
das muess me doch verbiete.
Wo kämmt me sunscht au aane
mit dem Saupagg nundefaane.

Ains, zwai, drei,
es isch e Sauerei!

In Basel schtehn vyl Hysli, in Basel schtehn vyl Baim.
Es seht e jeede Bebbi, do blieht kai scheene Kaim.
D’Regierig maint, me miess do handle,
bevor die Kaibe d’Schtadt verschandle
und in e Sumpf verwandle.
Nume zaahle will me’s nit,
s’Gäld längt zwenig wyt.

Ains, zwai, drei,
wie dyyr isch so-n-e Spray?

In Basel schtehn vyl Hysli, in Basel schtehn vyl Baim
und in suubere Hysli hoggt ain bi sich dehaim.
S’isch aine vo Dr GeGeGe,
dä hett däs Iibel gseh
und Gäld hett’s au, persee.
So losst me alles butze
zue sim aige Nutze!

Ains, zwai, drei,
und d’Wand isch wieder nej.

In Basel schtehn vyl Hysli in Basel schtehn vyl Baim
und d’ basler Moolermaischter hänn scho scheeni Draim.
Si draume s’wurd befohle,
si miesste jetzte moole
in Farbe ganz frivole.
Und sinn ab jetzt saniert,
will me jetzt garniert.

Ains, zwai, drei,
mi Gschäft isch au ganz nej.

In Basel schtehn vyl Hysli, in Basel schtehn vyl Baim.
Ych als Värslibrinzler hogg hitt z’Nacht dehaim.
Als Kunscht gitt’s nur no Blääch und Schrott,
kai Witz meh und kai Schpott,
s’isch alles dr glychi Trott.
Denn gsprayt wird nimme vyl,
Basel isch jetzt schteril.

Ains, zwai, drei,
läng mer schnäll dr Spray!

Uss aktuellem Aaloss no dä:

In Basel stehn vyl Hysli, in Basel stehn vyl Baim.
Gsprayt wird nit nur usswärts, nai sogar dehaim.
Es brucht e schampaar Maage.
Go spraye en mim Waage,
was sell ych do no saage?
E Schmierfingg hett das gmacht,
ganzu aifach iiber Nacht!

Ains zwfei drei,
ach sags dr Polizei!