1999

. Fasnacht 1999

Sujet: Drägg wäg

Jetzt muess dr Drägg wäg,
jetzt muess dr Drägg wäg.
Gross und glai, die sin derbyy.
Jetzt muess dr Drägg wäg,
jetzt muess dr Drägg wäg.
Unseri Schtadt sell suuber sy.
Was isch it de Lyt nur loos?
Alles gheit me hyt uff d Schtrooss.
Kaugimmi, Babier und leeri Fläsche,
Biggse, Heftli, en alti Däsche.
Sigs im Bus oder im Drämmli,
alles losst me liige nämmli.
Was sinn au das nur fir Maniere?
Dien Iir denn gar nyt me schtudiere?
Wenn me goot dur d Schtadt flaniere,
muess me sich jo fascht geniere.
Alles ligt jyt ummenand,
das isch wirgglig allerhand.
Jetzt muess dr Drägg wäg,
jetzt muess dr Drägg wäg.
Gross und glai, die sin derbyy.
Jetzt muess dr Drägg wäg,
jetzt muess dr Drägg wäg.
Unseri Schtadt sell suuber sy.
Wenn e Hund e Gaggi macht
oder Katze, mänggmol znacht.
Wenn aim e Duube uff en Epfel schysst
oder e Gschmagg in d Nase bysst.
Denne gits e ryyse Gschrey.
Me rieft grad no dr Bolizey.
Me luegt garn, was anderi mache,
mischt sich au in fremdi Sache.
Mit sich sälber isch me toleranter,
wältoffener und seer viil gwanter.
Anderi goots jo gar nyt aa.
Egoistischer kaschs nimme ha.
Jetzt muess dr Drägg wäg,
jetzt muess dr Drägg wäg.
Gross und glai, die sin derbyy.
Jetzt muess dr Drägg wäg,
jetzt muess dr Drägg wäg.
Unseri Schtadt sell suuber sy.
Au by Versicherige oder Bangge
isch d Hygiene schwär am grangge.
Me zaigt sich gärn mit wysser Weschte
integer, suuber, wältwyt am beschte,
klinisch rein, fascht scho schteryl.
No usse verbraitend s’guete Gfyyl.
Luegt me aber hinder d Fasaade
no wuuselets nur so vo Maade.
Die kemme alli us em Käller
dert jääsele d Lyche als wie schnäller,
syt as mee Liecht ins Dunggle dringt
und schaurigs undenuffe bringt.
Jetzt muess dr Drägg wäg,
jetzt muess dr Drägg wäg.
Gross und glai, die sin derbyy.
Jetzt muess dr Drägg wäg,
jetzt muess dr Drägg wäg.
Unseri Schtadt sell suuber sy.
Im Wooghof, so heert me munggle,
haigs schynts au Drägg versteggt im dunggle.
Schäärmyys wurde iir Unwääse dryybe,
sich insgehaim scho d Händli ryybe
und skrupellos, es wurd schynts loone
d Unterwält versorge mit Informatione.
Nit nur im Roothuus, au bi de Rammel
hett me ab däm Gschmäggli bammel
und foot zaghaft afoo uusemischte
us verstaubte alte Kischte.
Iibrig blybt, das muesch begryffe,
do und dert e Ranzepfyffe.
Jetzt muess dr Drägg wäg
jetzt muess dr Drägg wäg.
Gross und glai, die sin derbyy.
Jetzt muess dr Drägg wäg,
jetzt muess dr Drägg wäg.
Unseri Schtadt sell suuber sy.
Jä, Bebbi bisch jetzt immer no am lääse?
Denn gang jetzt haim und schnabb e Bääse,
richts Schawellwasser, Schtrupfer und e Lumbbe,
aber gang nit allzewyt go gumbbe.
D Aarbed muesch nit nääbedraa go sueche,
nit linggs, nit rächts, muesch jetzt nit flueche,
nit unde und nit oobedraa.
He, lueg mi nit so froogend aa.
Vor Dynere aigene Huusdiire
luegt mängg Schtaibli undefiire.
Wär bi andere als Rächt will ha,
muess vor dr aigene Diire suuber ha.
Jetzt muess dr Drägg wäg,
jetzt muess dr Drägg wäg.
Gross und glai, die sin derbyy.
Jetzt muess dr Drägg wäg,
jetzt muess dr Drägg wäg.
Unseri Schtadt sell suuber sy.