2000

Fasnacht 2000

Sujet: Comité quo vadis?

Gäll de kennsch my nit.
Dä Värs hersch hitte nimme wyt.
D Fasnacht isch hit nimm so anonym,
nimm so skuril und nimm so fyn
Hesch gmaint!
Wotsch dr fyni, alti Esprit finde,
lueg in glaine Gässli hinde.
Uff dr offizielle Cortège-Route
Findsch maischt n ur no Monschterpfludde,
wo sich am liebbschde sälber seen
und dängge: „Wie sinn mir doch scheen“.
So ischs.
Zem Gligg gits am Imbergässli so Figure,
huetbeweerte Fasnachtsaugure,
wo schträng dien driiber wache,
wär au wie duet Fasnacht mache.
Wär guet isch, dä dien si beloone,
intärn haisst das Subventioone,
die duet me wiirdevoll verdaile
und däwääg d Cliquekasse haile.
S isch woor.
Wär aber griegt dä Füllhornsääge?
Hesch gmaint alli, denn bisch dernääbe glääge.
Denn bim Comité sinn alli glyych,
arm isch arm und ryych isch ryych.
Egal eb Clique oder Gugge bisch,
es sitze nur die Groosse umme Disch.
Uff die Glaine luegt me n aabe,
als wäres numme Fasnachtsschaabe.
So dailt me sich der groossi Kueche,
fir uns Glaine blybt do numme s flueche.
Mit e baar Broosme duet me dy verdreeschte
Und s groosi Gäld griege die Greeschte.
Isch das rächt?
Derbi, wenn de wotsch e feyne Kueche ässe,
derfsch d Wyybeeri nit vergässe.
Das wisse scho die glaine Kinder,
nur am Imbergässli nonig alli Grinder.
Denn, goots ums Subventione vergää,
duet me s Wort „Schyyssdräggzyygli“ wetlig nää.
Dergege, und das basst wirgglig schlächt,
ass Blaggeddesujet sin mer wiider rächt.
Aber bi der Vernissage griege mer e kaine,
mit em Hiiwyys, mer syge numme „Glaini“.
Kunsch do no druss?
Do dra merggt me gly,
Mit fasnächtliger Fasnacht ischs verbyy.
Schtatt um Satire, Schpott und Witz
Goots hitte numme no um d Schtitz.
D Fasnacht wird als Tourischteaddraggtion verkauft
Und s Comité luegt, ass dr Laade lauft.
In de Drämmli, s isch fascht zem lache,
duet me fir d Blaggedde Reglaame mache.
Am Sylveschder, s isch zwoor in Hoose,
hätt me sotte dr „Urschrey“ loose.
Als Fasnächtler es isch e Hoon,
kunnsch der vor, ass wärsch dr Gloon.
Wiene Marionette, es isch nit glooge,
wirsch dur d Fasnacht duurezooge.
D Frau Fasnacht, die duet dängge;
Und s Comité, das duet längge.
Muess das so sy?
Jetzt wird my Kopf so langsam läärer
und s Värslibrinzle fallt mer schwäärer.
My Pegasus hett Hunger und wott uuse
und ych bi mied, ych haus go pfuuse.