2004

Fasnacht 2004

Ohni uns...

do laufft nid vyl,
das do z\'erglääre isch unser zyyl.

Mer händ zwenig noochwuchs joor fyr joor
Unser usstärbe stoht kurz bevor
das bassiert wenn\'s kaini kinder meh gitt
doch zem gligg isch es noonig sowytt.
Das bezieht sich nid uff unsere \'verein\'
mer wänn so blyybe \'klein aber fein\'
Mer händ e AHV wo z\'weenig yhname duet beklaage
Em Nationalroot schloot das schweer uff e maage
me diskutiert und ringt und ain bringt e idee,
doch konkreti leesige hesch noonig gseh
Es maint aine me kaa es teent fatal
jo druff verzichte, ihm isch\'s egal
E andere sait s\'problem blybt glich
AHV wänn alli ob arm oder ryych
E ganz e gschyde in dere b\'satzig
maint s\'räntealter sigg besser byy 80
Es wirft no ain e froog in d\'runde
fähle denn nur dr AHV Kunde?
Wenn d\'luegsch wär pension het glyy
do sinn die Geburtestargge joor derby
Familie mit 7 Kinder het\'s damals gäh
hütt hett das kai ainzigi vo zäh
Es isch nid numme d\'AHV wo duet liide
au anderi Branche duet me so \'miide\'
So setze d\'Lokalradio e Wärbespruch ah
Noch em motto: \'Los schwyzer gang dra\'
Will me seht wie die jugendliche dien fähle
isch äggscht das dr inhalt vom Ei, sprich s\'gääle?
Dass mir sotte unzählige Nochwuchs haa
das bestätigt uns e weise Maa
Wyll jedesmool wen d\'bym Sex e Pariser duesch näh
sott\'s noch däm vergniege nochwuggs gäh
Dä maa sait und sy wort het g\'wicht
Pariser sinn definitiv nid dicht!!!
Mir sinn uff die erkenntnis aabe
in d\'Condomeria und leere dä laade
Denn hänn mer probiert und g\'macht
Jo, au am daag und nid nur z\'nacht
Mer hänn se mit Luft g\'füllt, mit gas und mit wasser
Kaine isch platzt, dr schweiss macht uns nasser.
Mer hänn weder Kinder bikoo oder sunschtigi bräschte
Unseri sinn dicht mer verdaile dr räschte
------------------------------------------------------- nid.
mer wänn jo dass es meh kinder gitt
Mir sinn denn zer erkenntnis koh
dass es nur an eim Ort ka goh
Und zwar z\'Paris:
Deert ka me se nid numme Kaufe
Do gseht me sy schynts no laufe
E anderi Branche wo au vo säugling läbt:
Was macht e Hebamme wenns uns nümm gäbt?
Au wär\'s in vylne schwyzer stuube ohni läbe
Das fände mir e bits dernäbe.
Au dr WWF isch sich scho am sorge mache
Bi so ussichte ka e storch nümm lache
Wenn bi kinder d\'geburterate abegoht,
Denn isch är schlicht vom Usstärbe bedroht
Au unserer Wirtschaft fählt die neetigi kraft
ohni entsprächendi Jungmannschaft.
also liebi schwyzer-inne:
Vergässet mms, chat oder cyber
s\'gitt no öbbis unter de klaider
Und wenn dr\'s nid ohni spiele kennet ha
feen dr halt nomol mit deggterle ah.
Dir wärdet\'s gseh es isch e pracht
s\'isch scheen wenn me s\'richtig macht
Wenn d\'Schwyz sott e zuekunft ha
denn feend grad noch dr Fasnacht ah.
Denn au d\'Fasnacht isch denn emol dood
wenn\'s mit em Nochwuchs aabegoht.
Dorum sott meh scho uss dämm grund elai
weniger sy in dr Disco sondern dehai.
Und d\'näbewirke vom ganze sinn enorm
De verbrennsch kalorie und blyybsch in form
Aerobic und Wellness die Keschte kasch spaare
Kasch derfyr mit family in d\'Ferie fahre
Als Ziircher muesch nid gross investiere
S\'wär toll wenn mer dy wurde verliere.