2005

Fasnacht 2005
Gmietligi Itelpfad – Gnepf
www.gignepf.ch

Basel brennt!
Füür isch heimelig und warm,
Romantisch und entspannt.
Doch machts schnäll arm
wenn's nid im cheminé brennt.

In Basel sinn mer spezialischte
wenn's heisst s'duet neyme brenne
im füür entfache die beschte,
gseht me immer d'Fürwehr renne.

Vor 649 Joor isch no kaine profi gsy
wo's noch em bèbe het afoh faggle
isch meh s'wasser go hoole im rhy
und mit em kessel isch koh z'seggle.

S'fyyr hett gwyetet e wuche lang
und dr boode hett zitteret wie'n'e moore,
de byrger isch ang angscht und bang
hett äggscht e jeede s'huus und hab verloore?

Wo denn die ganzi Stadt schwarz gsy isch,
duur's bèbe zersteert und vom fyyr verkohlt
Hänn sych d'byreger gsetzt an e tisch
hett meh plän fyr e schutz uffg'moolt.

Ab em joor 1411 gyldet z'basel e Fyyrornig
deert wird beschriebe wär was mache muess,
d' Zynft synn fyr's leesche verandwordligg
d'bewohner fyr's putze vom ruess.

Das gsetz blybt bis 1763 in kraft,
ab denn bis 1845 gitt's e neyi situation
neu isch es dr Stänzler wo schafft
das düttet hi uff e militärisch organisation

ab 1845 wird das denn wieder anderscht
z'basel gitt's e sappeur pompier kompanie
das blybbt bis 1882 vo ihne beherrscht
denn isch au das kapitel wieder verby.

Im Joor 1882 wird sy in Basel gryndet,
die erschti schwyzer Berufsfyyrwehr
Si wird vo do ewäg als offiziel verkyndet
und isch verantworltligg fyr bränd und vyl mehr.

 

Die Fyyrwehr isch fyr vieles doo:
em Luigi sy käller go usspumpe
em Lineli s'busi vom baum aabeloh
Oder ain abhalte vom abegumpe

D'fyyrwehr hett scho viel miesse springe
an ort wo schwer erreichbar sinn
jä, sogar g'waltsam miesse yydringe
zem kontrolliere hett's no mensche dinn?

elai wenn de dir emol vorschtelle duesch
was ohni sy wär gsy in dr schwyzerhalle
wenn emol yberlegsch s'waär so gsy, das muesch
wais i nid ob's dir no ohni Fyyrwehr wurd gfalle.

Au im joor 2004 isch's wieder nid ohni gange
wyll mir anschynend pyromaane synn,
muess meh immer wieder um vertraut's bange.
s'wär doch scheen, d'flamme blybte dynn.

So hänn mer im letschte joor dörfe beschtune,
im depot hett's g'fagglet, und si sinn mit wasser drah
Uff die mitdailig isch sy grad bärgab, mi luune,
hänn mer doch vor joore wasser im Musiggkäller kah

Glyggligerwys fyr unseri Inschtrumänt isch dä Brand
Nid im vordere dail vom Wiesedepot gsy
sondern hinde im ahbau ,noch by dr Wand
dr R. unsere Obergnopf jedoch luegt druurig dry.

By däm brand hett me die maischte ahänger und drämmli
uss em Depot vor em Brand und Rauch kenne rette
sunscht wurde jetzt meh sage: uff dy warti nämmli
do wurd i mit dir um e grosses oder e gspritzte wette.

Es synn no vyl meh ysätz gsy wo sy hänn miesse laischte
In dr regel isch's routine oder e falsche ,denn goht's wieder zrugg
Wohnigs-, kuchi und Tannebaumbränd die maischte
Aber au e brennende Laschtwaage z'midscht uff dr brugg.

E anders Kapitel vom fyyrle und brenne
Isch das vo unserer Ladärnepracht
nur um e paar byspiel z'nenne
S'isch gewaltig wenn sy lüchte z'nacht.

Syg's e stägge- oder e kopfladärne,
aini vom Staam oder e're junge garde
es isch zer erinnerig z'erwähne.
s'synn alli uss eme Verbott erfunde worde.

1845 hett me offeni fyyr an dr Fasnacht verbotte
das zem schutz vo dr stadt und bränd
das hätt au dr tood vo faggle sy sotte
jetzt hett me halt Ladärne in de händ.

Sytt dere Zytt synn scho mängg joor vergange
laider hett's au scho e paar ladärne verbrennt
Und wenn me in dene momänt au duet bange
isch d'fyyrwehr au do immer grad grennt.

 


Mer hoffe s'gytt dasjoor kai grund fyr alarm
kai unfall, kai ladärne wo lichterloh brennt
s'wätter sygg scheen, nid z'kalt und nid z'warm
mer wyntsche e scheeni fasnacht, so wie meh's do kennt.