2006

Fasnacht 2006


 

So e Kaschperlitheater

tratratrallalo, tratratrallalo,
Dr Kaschper dä isch wieder do
Dr Kaschper dä isch do


Zämme!


Hytte dien mer e bitzeli persifliere
I hoff dr diend nid grad demonstriere,
mer bringe zwar kaini Karikatuure
aber hinderleen trotzdäm au unseri spuure.

Es isch scho e Theater rund um die ärde
Duet d'Menscheit wyrgligg no blöder wärde?
Allne voraa dr Tschii Bii uss de Ju Es of Ei
Mi dunggt in däm sym Kopf hett's nid emol meh brei.

E heimetschutzorganisation duet är grynde
Wo sich noch dr Katrina in nöt duet winde,
Wieso denn reagiere? i by nid deert!
Und solang i nid deert by, 's mi nid steert.

Worum muess me sofort hilf go laischte?
S'hett kai Feindbild fyr die maischte.
Die ryche vor Ort sinn au nid betroffe,
S'sinn numme armi und junkies versoffe.

S'gytt e riese gschrei vom Bürgermaischter 'on är',
druff aabe isch dr Tschii Bii nümm so populär.
s'joor het guet aahgfange mit dr wiederwahl,
sinkt doch nohär drastisch si wählerzahl.

Nümm gwählt worde isch au dr Schröder,
Das Theater by dene bewiest, s'goht no blöder.
D'regierig entzieht em Gerdadt s'vertraue,
Duet by de Wahle aber wider uff en baue.

Sy Kontrahännt -(in), me sayt es sygg e Frau,
Mer hänn's nid kenne Kontrolliere und wisses nid genau.
Dr Wahlkampf isch eröffnet, e riese spektakel,
und fyr dä wo gwynnt, untypisch, e debakel.

D'schwoobe luege ohni definitive CEO blööd dry,
Es isch e riesetheater, e jede will Kanzler sy.
Mir kunnt do nur ei gezielt Parabel in sinn:
Schwoobe und Kindergaarte, 'Sind wir schon drinn?'.

De muesch aber nid numme by de schwoobe go luege,
Au in dr Schwyz hänn mer ganz oobe glaini buebe.
Mr hänn do ain, dr B uss Kü, da isch ganz gspässig,
und alli rund um ihn wärde maischtens hässig.

Wenn är sy muul uffmacht, denn wird mir schlächt,
will är hett sowieso, yberhaupt und immer rächt.
Pletlzig kunnt s'wort Konkordanz in d'runde
und s'kollegialitätsprinzip isch im käller unde.

Ych frog eych, Wär duet no uff so kindskepf baue?
Wo sich vor de medie fascht in ranze haue.
E grosses Theater duet me au in zyri uffiehre,
Sy kenne fyr EM knapp e Satdion presentiere.

By uns macht derfyr dr Gimmygool e gschrey,
i cha nymm, i will nymm, lend my frey.
Mer leen en druff aabe uff Marseille usswandere,
deert sitzt är jetzt uff em bänkli näbbscht andere.

Es zaigt au d'Saskia Frey e groose durchhaltewille,
noch em erschte Durchgang verabschiedet sich die pille.
Sy hätt vylicht aimol in's Theater sotte goh,
Denn hätt sy sicher 100 Stimme meh bikoh.

S'Theater wird vo allne jetzt wäg-subventioniert,
drfyr wird sinnlos in Baizebestuelig investiert.
Als Baizer muesch jetzt Stiehl nach schema F uusestelle,
So ebbis blöds ka i mer heggschtens in Ziri vorstelle.

E riesetheater inszeniere sy au an dr Wiese, dr Aue,
Die ainte wänn nid, die andere wänn Stroose baue.
E g'stritt, wie me's vo Erwachsene nit kennt erwarte,
Wohne die alli au im Zält oder im Garte?

By soviel Theater rund ums joor vergoht mir s'lache,
I froog mi ächt: synn die no ganz .......do?
Mer hänn vyl wichtigers z'tue uff dere wält
Aber bi däm wichtige verdient me kai gäld

So, s'Theater do isch fertig, dr Kaschper goht hai,
Fyr's Theater im läbe los ych eych elai.


D Ladäärne-Uusstellig uff em Minschterplatz und
d Waage- und Reggwisyte-Uusstellig bi dr Kasäärne
sin vom Määntig znacht bis am Mittwuch demoorge!