2007

Fasnacht 2007

Gäll, de kènnsch mi nit
und das syt 20 Joor

www.gignepf.ch

Wotsch an d Fasnacht bruuchsch e Gòschdyym,
frogsch di als was sölli go
Waggis, Harlekin, Dummpeter, Bebbene
Alti Tante. Blätzlibajass oder Pierro.
Alles tradizionelli Gòschdyym, oder solli e
fantasyy Lumpe nä?
Friener isch alles viel aifacher gsi
D Mamme het us Stoffräschte eppis zämme gnait.
Im Keller, mit em Pappe, us Papier und Glaischter
e Larve kaschiert und scho bisch baraad gsi.
Wen de hyt wetsch derby si, muesch fascht
e Roobe vom Lagerfeld oder Armani ha.
Au d Larve macht me nimmi sälber
s ka nit dyyr gnueg si, e Kinschtler muess aane.
Uns seesch au scho syt 20 Jòòr am Cortège
mit sälber gnaite und gfertigte Gòschdyym.
Scheen gstailt syn mr drhär ko.
Das Joor wämmer is tradizionell zaige
und eych verzelle was es mit de ainzelne
Individue uf sich het

Waggis
Dr Waggis isch die Figur wo me am maischte gseet.
Friener mit glainem Kopf wenig Hoor und lyycht ybertribener Nase.
Baslerhuet oder Ruessgiggli. Hyte muess dr Kopf gigantisch sy
Bèrigge lang bis zum Fyydle, an d Flòsse gheere Zoogeli.
E richtige Waggis het e Gärntli derbi )
wo mit Zybelle Ryebli und Häärdèpfel gfillt isch
Orange und Dääfeli derfe au nid fääle.
s Gmies wird fir s Intrigiere bruucht
Zybele fir d Maidli, Riebli fir e alti Jumpfere
Orange fir e schnuggigi Maid und Dääfeli fir d Kinder.
Vo wo kunnt dr Waggis. Jo dòò isch me sich
nit ainig, Die ainte sage vò de Bewohner vom „Wasgaues „
die andere maine vò de „Vagus“. So het me
friener de Landstryycher gsait. Und im Oberelsass
isch schliesslig s`Wort Waggis zämmegschmolze

Harlekin
Us em Arlecchino isch de Harlekin entstande.
Ganz friener als Fasnachts Gòschdyym nit bekannt
isch dr Harlekin hyt e beliebdi Figur.
Es git en mit oder ohni Cape. Schlicht oder Farbefroh
kunnt er dehär

Dummpeter
Isch aigendlig e Trompeter us dr Rokokozyt.
Er het e vertrauts, fascht kindligs Gsicht,
Pfuusibagge, e wyssi Bèrigge mit Zopf und e
luschtigs Käppli a.
Als Requisit e Drumpete uf dr Bruscht.
Me sait das dr Peter e glains Gnippeli
in dr Zunge gha het und so nit
het kenne Drumpeter sage
sondern Dummpeter, jo und e so
sait me au hiite no Dummpeter

Bebbi oder Bebbene
Jo wie das Wort scho sait ......Frau und Herr Basler
S Gòschdyym natirlig schwarz / Wyss in
allne verschidene Variatione. Uffem Kopf derf e Baslerstab nit fääle.
Me ka fascht sage d Fasnachts - Tracht vo de Bebbis.

Alti Dante
Alti Tante gits in Basel wie Gwäggi im Ryh,
sigs an dr Fasnacht oder unterem Joor.
S git se schlicht oder uffpept
mit grossem oder glainem Huet. Vielmool isch
uffem Huet e scheene Summergarte.
Es derf aber au e glaine Capottehuet si
Fääle derf natirlig au s Ryydigyl nit
Dr Ursprung fiert is wider an
aafang vom Zeedel, denn
friener het me ........e alte Rock
vo dr Mamme und e Bluse vom Grosi
gno und isch so dur d Gasse zooge.


Ob mit oder ohni Goschtym, me goot an d Ladäärneusstellig.
Die isch vom Fasnachtsmäntig Zoobe bis
zem Mittwuch de morge uf em Minschterblatz.