2008

 Fasnacht 2008


 

 

Kasch dä Fuessballzirkus no vertraage oder
platzt dir bi däm Rummel au dr Kraage


D’ EM 08 isch glaub ebbis bsunders,
ganz Basel isch verruggt, wär wunderts.
I hoff das ganzi goht nid in d’Hoose,
sunscht miemers halt im Radio loose.
D’ Beize derfe nimm verkaufe was sie wänn,
denn dert isch d’FIVA schambar sträng.
E Bilett kaufe kasch fascht vergässe,
mit däm Gäld kasch fünfmol warm go ässe.
Dr Hit isch, dass au Schpiil sin bi uns in Basel,
denn kasch go loose das Fachsimpelgfasel.
Was meinsch wie alli besser könne schutte,
und denn flueche si über dr Goaly die Pflutte.
Kasch niene aane ohni dass si dien frooge,
hesch gescht dr Matsch gsee mit de Schwoobe.
Dr Verkehr darf bim Joggeli au nümm faare,
was meinsch wo gosch denn dure mit de Waare.
Die Zyt wo mir im Verkeer dien versaue,
kensch bruuche fir e Hysli z’baue.
Mit em Tram go schaffe, kasch au vergässe,
am beschte blibsch im Gschäft zum ässe.
Dört kasch au nümme normal schaffe,
denn alli dien in e Färnsee iine gaffe.
Wenn ein unverhofft in mi Büro iine trampt,
denn frogt doch dä mi, es isch frapant.
dä meint ich lueg dr Matsch im Disspley,
denn sagi halt, es isch scho drei drei.
Gosch hei und wotsch ändlig di Rue,
denn kunt dr Glei und frogt, - was meinsch drzue?-
Är meint dr Matsch, wo hüt gschpiilt isch worde,
ich gib kei Antwort und biss in e Stiggli Torte.
Us lutter Fruscht gang i ab in e Baiz und will mi Rue,
do frogt scho wider ein - was meinsch drzue? -
Är meint in dr ganze Stadt das Buff und dä Lärm,
das sig är nid gwöönt denn är kunt vo Bärn.
Är sig au nid gwöönt sovill Lüt uff de Stroose,
und macht vor lutter Angscht fascht in d’Hoose.
Bimene Bier - nid das vom Ueli -
joomeret är fascht wiene Chueli.
Är meint und däre Meinig bi au ich,
mir haue ab und göhn an d’Albe Dych.
dört kasch rueig go laufe öb rych oder arm,
bim witerdiskutiere wird’s uns au dört ganz warm.
Mi hänns vom Gäld und was das alles koscht,
do weisch am Schluss wo dr Bartli holt dr Moscht.
Dr Gwinn duet d’FIFA sälber istryche,
und s’Gäld kunnt nid öbbe vo de Ryche.
Vo de Stüüre nimmt mes und das goht nit in d’Hoose,
me baut nochär eifach weniger Stroose.
Für Spitäler hets denn au kei Gäld mee,
denn erhöht me d’Stüüre ums persee.
Jetz muesi here mit em Gschwafel und em Gschtürm,
sunscht griegi am Schluss den doch no Würm.
Die EM 08 isch halt doch e diggi Sach,
und mir drumumme sin halt nit vom Fach.
So Hyylgschwaffel dien halt Klatschschpalte fille,
und mir z’Basel luege das aa mitere andere Brille.
Villicht het firs Defizit vo dr EM 08 z’fille,
unseri Basler Chemie sogar e Pille.


D Lädäärneusstellig uff em Minschterblatz und
d Waage- und Reggwisyteusstellig bi dr Kasäärne
sin vom Määntigznacht bis am Mittwuchdemoorge!