2009

 Fasnacht 2009


stärbe Basler uss ?

Mir Basler sin das isch scho bald kolosal,
in de Sprooche nozue International.
In dr Chemie hörsch nummeno Främdi schwäze,
zwüschenyne verschtoosch doch no e Fätze.
Im Kindergarte muen si Hochdütsch parletschiere
das will d’Schuelkommission durestiere
In de Schuele seesch wo das anefiert
Baseldütsch schwätz numeno jede viert.
Uff hochdütsch dien si im Drämmli asaage
wenn ich das nur scho hör platzt mir dr Chraage.
Wotsch dr Drämmlifüerer öbbis frooge,
ischs e Franzoos oder ein vode Schwoobe.
Wende in s’Konsi gosch go poschte,
no sitzt hinter dr Kasse eini vom Oschte.
Wende d’Ussdrügg vode Junge duesch aloose,
no gheit dir s’Härz drby fascht in d’Hose.
Au bim Schariwari hett’s fremdi Stimme,
dje singe s’nöggscht Joor Bärnerhymmne.
Suechsch e Stroos und wotsch öber frooge,
denn mache die um di e groosse Booge,
nid wie sie‘s nid wüsse oder gar nid wänn saage,
sie dien nämlig dr Baslerdialäggt nid vertraage.
Frogsch imene Amt dä hinterem Schalter,
denn luegt di dä a wie ein vomene ander Planet,
Är goht hindere und holt dr Verwalter,
und dä sait: Entschuldigung er versteht si need.
Au är isch nid vo Basel das hani gmerkt,
ich glaub i bi do inne grausam verkehrt.
Us Fruscht gangi in e Baiz und will öbbis bschtelle,
do muesi das au do uff Schriftdütsch verzelle.
Chasch mache und saage was de wotsch,
als Basler chuntsch dr efangs vor wiene Dotsch.
Bim grüesse sage dje meischte efang „Tschüss“,
au doo griegi langsam efang Müüs.
Mir z’Basel sago doch “Sali“ und das isch klar,
das tönt doch in de Ohre wunderbar.
Es goht nümm lang do druff chasch schwöre,
Baseldytsch wirsch bald nümm höre.
Duet Telebasel e Fabrikbsitzer oder e Ceo zeige.
no hörsch au do bisch im glyche Reige,
Die meischte Mänatscher sin au nid vo Basel.
das merksch schpöteschtens am komische gfasel
Wenn das so wytergoot denn muesch di frooge,
es goht nümm lang no gheere mir zude Schwobe.
Dr Baslerdialägt mues brucht und pflägt wärde,
denn Basler gits nümm so vyl uf unsrer Ärde.


D Lädäärneussstellig uff em Minschterblatz und
d Waage- und Reggwisyteusstellig bi dr Kasäärne
sin vom Määntigznacht bis am Mittwuchdemoorge