2010

 Fasnacht 2010

 

 

vom Velo kuriert

Hesch e Brief oder e Päckli wo duet pressiere,
denn due nume schnäll im Velokurier delifoniere.
Wie und wo si fahre darfsch die nid frooge,
sunsch wirsch jo sowisoo nume aaglooge.
Im Summer chöme si zu dir völlig verschwizt,
und schnufe wiene Brauereiross im Kafi Spitz.
Im Winter bringe si au dr Schnee ins Büro iine,
d’Putzfrau die goht nachhär grad go griine.
Gege d’Fahrrychtige faare si völlig rücksichtsloos,
und wendene riefsch heissts: “ was isch loos “. Jedesmool wenni e agschrybene Veloraser seh,
wirt’s mir für alli uff dr Stroos Angscht und weh.
Due bätte as allne Verchersteilnämer nüd passiert,
wenn ein vo däne mitem Velo so pressiert.
Als Fuessganger oder Wanderer in dr Schoore,
bisch wäge däne Kurier voll in de Gfoore.
Als Trämler, Mofa, Roller oder au bim Autofahre,
muesch uffpasse sunsch chömme die uff e Baare.
Fuessgängerschtreife griege zuesätzlichi Ample,
do chunt no eine druff wo au duet schtrample.
Dr Kurier kennt nur sich und das Wort dallidalli,
denn s’ Verchersgsetz das zellt sicher nid für alli.
Si faare überall und au verbote uff de Tramgleis,
und wenn eins bimbelet denn mache si no Meis.
Aaschtand isch halte nur öbbis für alli Andere,
sy dien s’ Verchersgsetz nume unterwandere.
Es isch e bombe Gschäft so Kurier chönne z’halte,
mir blybe aber doch lieber no bim Alte.
Mir göhn uff Poscht und bringe dr Brief dört ahne,
und hoffe dört funkzionierts no in normale Bahne.
Bi dr Poscht bisch zwar nid sicher wenns aachund,
dorum gits Kurier, mir glaube das isch dr Grund.
Ich glaub wenn die Kurier schpöter e Auto chaufe,
chasch nidemol mi uffem Trottwar laufe.
Mir hänn e Idee wieme die chönt diszipliniere,
mitere groose Nummere hinde uffem Ruggsagg,
wende öbbis seesch chasch dr Polizei delifoniere,
und denn verschwindet langsam das strube Pack.
Denn alli d’Bolizischde mir meine au die Alte,
chönne glaub au e grossi Nummere bhalte.
Uffem Trottwar normal laufe das wär doch schön,
ohni dass me nachhär an de Bei het blaui Möön.
Mir dien uns jetz an d’Reegle halte in alle Sache,
denn cha dr Schutzängel e längeri pause mache.


D Lädäärne-Usstellig uff em Minschterblatz und
d Waage- und Reggwisyte-Usstellig bi dr Kasärne
sin vom Määntigznacht bis am Mittwuchdemoorge!
Deert und an de 3 Verkaufsständ (CINS) in dr Stadt
ka men au alli Zeedel und Schnitzelbängg,
d Blaggedde und dr Rädäbäng kaufe.