2011

     machsch au am
   Wettbewärb mit ?
 
Wettbewärb do und Wettbewärb dört,
das hesch du sicher au scho ghört.
Wenn de glaubsch bi dr Fasnacht isch’s nid eso,
denn muesch emol inne Süschesitzig go.
 Dört isch’s bald wie an jedem andere Aaloss,
d’Süschekomission innere Clique isch do dr Boss.
Öb de rächt chasch laufe drummle oder pfiffe,
dien die wenigschde vo däre Kommission begriffe.
Es wird immer s’schönschte Süsche gsuecht,
dr beschdi Schnyder wende bisch guet beduecht.
Dr beschti Schtoff isch sälbschdverschtändlig drby,
denn die Schönschde wänn mir wie allewyl sy.
Uff dr Schtroos mueses lüchte, glizere au znacht,
chasch nid rächt hogge für das isch’s nid gmacht.
Seisch denn de chasch di nid rächt bewege drin,
heisst’s numme das isch doch gar nid so schlimm.
Denn scho bim erschde Halt am Mändigzmittdaag,
wänn e paar das Goschdym hängge ane Haag.
Es duet dir nämlig alles weh vo unde bis obe,
und du setsch doch no durehalte bis zoobe.
Am Mittwoch sehn Goschdym scho schäbig uss,
z’Süschekommission chund do gar nümm druss.
Si hänn s’Gfühl du hesch im Goschdym gschloofe,
oder bisch sogar mit däm go schwoofe.
S’isch jo glych d’Fasnacht isch jo bald umme,
no sin d’Schtroosewüscher denn die Dumme.
Denn wenn’s am Donnschdig vieri schloot,
muesch’s wägschiessee sunscht isch’s z’schpoot.
Denn heinäh muesch das Goschdym nümme,
no muesch di bim heigoo nümme verchrümme.
Schad isch numme und do bruchi e guete Root,
was macht me dass me weiss wär drunter stoot.
Au d’Latärneform cha nid komblizierd gnueg sy,
sunsch bisch bi dr Subfebndsion vorne nid drby.
Öb s’mache vom Gschdell er Vermöge choschdet,
schpielt do kei Rolle es wird eifach boschdet.
Dä Süscheobma vo de nögschde Joore,
chasch mir glaube dä isch sicher noni geboore.
Denn jede will besser si als dä vom letschde Joor,
sunscht isch dä vom schdeigere nümme woor