2012

 

Fasnacht 2012
 
Legal oder nid Legal
 
  
                   www.gignepf.ch
 
Wotsch emol e luschdigs Gartefescht mache,
den dängsch de bisch sicher nid ganz bache.
De muesch nämlig e Bewilligung go beatrage,
sunsch göhn si dir am Gartefescht an Chrage.
 
Duesch dehei lut Musik mache oder singe,
duets scho feschd an dr Huustür klingle.
Öbme das dörf oder nid isch mir furzegal,
s’isch sowiesoo efang alles ilegal.
 
Am Voltaplatz oder au in dr nöchere Umgäbig,
macht me was me will und macht no Wärbig.
Duesch zünserle oder sogar demonschtriere,
machsch alles kaputt es cha dir jo nüd passiere.
 
Binere offizielle bewilligde Demonschtrazion,
chasch vermummt cho ich find das isch e Hohn.
Me loht die laufe, au me findet das lässig.
d’Bolizei seit numme es wär nid verhältnissmässig.
 
Duet aber d’Bolizei mit harte Mittel ygriffe,
denn gits wiedr viel Lyt wo gege das dien pfiffe.
Chasches hüt mache wie de wotsch,
denn am Schluss bisch doch immer dr Dotsch.
 
Au in dr Politik schwätzt me vo dr Legalität,
es chund nur druffa vo wäm mes het.
Wenn me ein umsverrege will in Pfanne haue,
no lost me sogar bi de Bangge Date chlaue.
 
Date chlaue und verchaufe sig eigentlig verbote,
es sei denn me chas bruche zum eine use mobe.
Oder chauft me gschtohleni CD mit Bangge Date,
denn chasch uff e Verurteilig sicher no lang warte.
 
Wenn de uff dr Autobahn rächts duesch überhole,
chunt Bolizei zu dir und duet di Fahruswys abhole.
Und fahrsch emol zschnäll wenns pressiert,
wirsch nachhär vo dr Bolizei ney dressiert.
 
Delifon ablose lo isch ganz sicher au ehrlig,
nur verwütsche lo das isch denn gfehrlig.
Au wenn dr oberscht Richter bisch isch das ilegal,
oder wotsch nümm bi dr nögschte Wahl.
 
De sehsch d’Legalität cha me uslege wie me will,
machsch öbbis Legal bringts dir sicher nid vill.
Bi de große chasch seh wie me’s Hüt duet mache,
und machsch’s nid au denn bisch nid ganz bache.
 
Ganz legal an d`Ladäärneussstellig uff em
Minschterblatz und d`Waage- und
Reggwisyteusstellig bi dr Kasäärne offe vom
Määntigznacht bis am Mittwuchdemoorge!