2013

Fasnacht 2013
                       
                      
           
                              www.gignepf.ch
 
 
      d’BVB wot in
 d’Schämpienslieg
 
Neuschdens muesch das isch nid zum lache,
als BVBianer mit dungle Schue go schaffe.
Au privati Jagge dörfsch bim schaffe nümme trage,
öb dusse schtoosch oder dinne im Waage.
 
Agschrybe muesch au si im Bruschtbereich bigot,
sunsch gits wenme di verwütscht e Saperlot.
Die lange Unterhose dörf me unde au nid seh,
sunsch gits bim Zahldag ändi Joor gar nid meh.
 
D’Sytetäsche an de Hose vertreit kei Büle,
sunsch mues dr Schef wenn är di seht go hüle.
Au d’Haltig isch ganz wichtig im Füererstand,
und wo ane ghört bim länke ächtsch d’Hand.
 
Das alles isch kai Furz von de Basler odr yri,
nei das chunt vo dr Frau Rottemaier us Zyri.
Ich weiss was me mit däre schnäll söt mache,
me schiggt si zrugg, und duet si inne Blache.
Ich glaub ganz fescht die isch nid ganz bache,
bi uns in Basel chasch sö öbbis nid mache.
 
Ich würd sage es gäb ganz anderi Sache,
wo me bi unsere BVB müesst mache.
S’Rollmaterial wo mir hän isch gar nid s’Beschde,
wenn’s nid glaubsch no gangs doch go teschde.
 
Die neue Drämmli vo dr BLT sin nid guet gnueg,
me will anderi probiere und het e sau grose  Muet.
Si mache wiedr e Teschd – d‘Siemens lost grüesse
am Schluss muesses dr Fahrgasch wiedr büesse.
 
Bi de elektronische Fahrgascht - Infotafele glaubi,
do het e Verwande vo mir mitgwirgt, dr Haugi.
Au är het immer baschtled und alles usprobiert,
aber bi ihm het au s’meischde nid funkzioniert.
 
Öbbis funkzioniert bi unsere BVB aber gewaltig,
Ich mein drmit dr Stelleusbau in dr Verwaltig.
Hesch nid zdue, wotsch unbedingt go chrampfe,
d’Verwaltig cha neui Tschöpp usem Bode stampfe.
 
Bim Fahrpersonal dört dien si grausam schpaare,
es dien jetz au Gränzgänger unseri Trämli fahre.
Das isch billiger meint unseri hütigi Dirägzion,
und druggt bi unsere Schwizer Lüt uffe Lohn.
 
Sie kenne unseri Stadt nid das schpielt kei Rolle,
wenn de die öbbis froge wotsch die Tolle,
denn düen und chöne si dir kei Usskunft gä,
wo wänn si das Wüsse den au häre nä.
 
Mit däm allem will sich verbessere unseri BVB,
ich glau aber das hän mir alli scho emol gseh,
es isch immer esoo, wenn me meint me sig drby,
am Schluss bisch ganz drnäbe und au ganz chli.