2014

Fasnacht 2014
                       
                        
           
                              www.gignepf.ch
 
 
 Gäll, das Departemänt isch nid suuber
 
 
Dä wo s’Gäld bhalted het duet sich entschuldige,
und duet sich zruggzieh, das isch Konsequänd.
Dr anderi schnurr sich uuse är sig e Geduldige,
und wehrt sich wehemänd mit Füess und Händ.
 
Dr Regierigroot schützden dur alli Böde dure,
me verstohden chum mit siner Turgauerschnurre.
In däm Departemänt chasch mache wasde wotsch,
und wende normal reagiersch bisch none Dotsch.
 
Bi de Oschtschtaade schimpft me das „Korruption“,
und bi uns seit me däm – i glaub Organisation.
Gfallt dir s’Gschäftsauto nid, das isch kei Sach,
me nimmt e grössers, und bhalteds underm Dach.
 
D‘Hauptsach isch die Untergäbene dien schpaare,
no cha dr Schef no lang e düüre Chaare fahre.
Me duet wemme au sini Fründe cha portiere,
denn schpöter sicher au do no profidiere.
 
Ich würd sage es gäb no ganz anderi Sache,
wo me bi unsere BVB chönnt besser mache.
Saged euerem Schef doch eifach är söll doch goh,
und drby dr Departemäntscheff au nid doloo.
 
Denn dr Wessels duet au unseri Schtadt versaue,
däm chasch au bim regiere nid übere Wäg traue,
Mitem Innerschtadt Vercherskonzäpt het är welle,
für dr langsami Verchehr e Superweiche schtelle.
 
Dureboxe het är das welle trotz wenn und aber,
was drby use choo isch das isch scho makaber.
D‘Füürwehr, d’Sanität und sogar Polizei hät selle,
vorem ynefahre übers mail e Aatrag schtelle.
 
D’Handwärger hätte im Notfall nid ynefahre dörfe,
si hätte für d‘Bewilligung sötte im Internet go sörfe.
Oder eifach ynefahr und drby e Buess rissgiere,
und die am Schluss bim Chund wiedr ykassiere.
 
Oder wenn e Buessezeedel an dr Schybe hesch,
denn gosch uffe Polizeiboschde go diskudiere.
Die Zyt zahlt alles dr Chund - das wär dr beschd,
so Seich het das Departemät chönne ussstudiere.
 
Die mittleri Brugg söll me au no schpeere ,
no muesch di als Fuessgänger nümme so wehre,
In de Ussequartier macht me jetz Drissgerzoone,
natürlig au dört wo dr Wessel duet wohne.
 
Ich hoff das alles isch numme e böse Traum gsy,
und wenn ich wiedr verwach denn isch alles verby,
Sunsch mues ich mir ärnschthaft Gedange mache,
isch eigendlich dä Regierigsroot no ganz bache.
 
 
D Lädäärne-Usstellig uff em Minschterblatz und
d Waage- und Reggwisyte-Usstellig bi dr Kasärne
sin vom Määntigznacht bis am Mittwuchdemoorge!
Deert und an de 3 Verkaufsständ (CINS) in dr Stadt
ka men au alli Zeedel und Schnitzelbängg,
d Blaggedde und dr Rädäbäng kaufe.