2015

Fasnacht 2015
           
           
                        
                              www.gignepf.ch
 
 
 
    Basel isch sicher
 
 
Wenn’s denn in dr Stadt emol gförlig cha wärde,
und me drby au grad no chönnt schtärbe.
Denn macht me um d‘Muba umme eifach e Haag,
denn fühlt me sich sicher und isch drby ganz stark.
 
Wie sicher Basel isch hesch ganz eidütig gseh,
an dr grosse Konferänz vo dr OSZE.
Dört het Dir ganz sicher nüd chöne passiere,
wenn hesch chöne inne am Hag umemarschiere.
 
Wenn de aber Zoobe emol in Ussgang willsch go,
no losch bitte dehei dr Schirm nid lo schtoh.
Viellich chaschen bruuche zum di verdeidige,
am Schluss chund Polizei und will di vereidige.
 
Im Räscht vo Basel cha sowieso nüd passiere,
Politiker hänn jo gseit si heige Gfohr chöne pariere.
Uffpasse muesch halt glych mit sottige Sache,
Denn e Schirm zellt Hüt zunere gföhrliche Waffe.
 
Gohsch emol amene schöne Oobe uff Gass,
triffsch überall Polizischde das isch ganz Krass.
Jetz müen si z’fuess cho die arme Sieche,
denn d’Stadt isch gschperrt - fasch bis uff Rieche.
 
Gohsch inne Lade und wotsch öbbis go chaufe,
denn duet Dir unschinbar e Maa noche laufe.
Duet numme ummelungere und isch in Koknidoo,
är luege öbdel hesch öbbis in Sagg inegnoo.
 
Au wennde niemer sehsch wo di duet verfolge,
ich sag Dir du gheisch uss allne Wolge.
Me seht überall wo Du duesch ummelaufe,
und weiss am Schluss was Du duesch Ychaufe.
 
Au wenn Du bi Rot über d’Schtroos duesch laufe,
chasch sicher si Du bisch innere Dateschlaufe.
Und wenn’s denn zumene Unfall chund e chleine,
Denn het di d‘Polizei ganzi sicher scho an dr Leine.
 
Aber wenn denn emol öbbis chleins passiert,
oder sogar schlims do wo‘s sicher pressiert.
Denn isch kei Polizei umme chasch sicheri sy,
bis die chunnt isch scho alles vorby.
 
Wennde denn am Morgefrüe duesch Zytig lässe,
hols dr Teufel und i friss e Bäse.
Denn chasch seh was Geschdr alles isch passiert,
nennt me das me heig alli Gfohre scho pariert.
 
Am sicherschde bisch - ich mein dehei
Aber au dörte muesch sage   - nei, nei.
D’Politiker und Polizei sage das isch doch sälte,
Wenndr Problem hänn denn müendrs halt mälde.
 
 
 
D Lädäärne-Usstellig uff em Minschterblatz und
d Waage- und Reggwisyte-Usstellig bi dr Kasärne
sin vom Määntigznacht bis am Mittwuchdemoorge!
Deert und an de 3 Verkaufsständ (CINS) in dr Stadt
ka men au alli Zeedel und Schnitzelbängg,
d Blaggedde und dr Rädäbäng kaufe.