2016

In dr Schwyz verdient in Dütschland vertschädered

Wende in d`Stadt wotsch go öbis chauffe,
no muesch verdeggel efang sehr wyt laufe.
Denn jede fünfte Lade macht jetz denn dicht,
denn dr schwachi Frangge isch jetz e Gsschicht.

Me will jetz mit allne Mittel probiere die Chunde,
in d`Stadt hole mit Gratisparkplatz für zwei Stunde.
Aber bis e Lade gfunde hesch i due nid übertrybe,
hesch im Parkhuus e Buessezeedel uf dr Schybe.

Wende Pryse im Dütsche emol duesch studiere,
no muesch di bim drufluege fascht scheniere.
S`meischde choscht und das isch nid glooge.
e Drittel weniger und erscht no d`MwSt. abzooge.

In dr Schwyz schaffe bringt für uns e huffe Gäld
aber ychaufe chasch mit däm uff dr ganze Wält
Mir z`Basel hän sowieso für ins Dütsche nid wit,
chasch s`Drämmli oder s`Velo nä wenn du bisch fit.

Ich verschtohs wenn e Familie use goht go chaufe,
wenn si Chinder hän no chönne si erscht no laufe.
Aber du muesch uf Parkplätz luege was dört stoht,
sisch nid dr armi Cheib wo dört zum ychaufe goht.

Dr Wessels duet unseri Stadt no ganz versaue,
däm schasch bym regiere gar nüm übere Wäg traue.
Är loht sogar ins Dütsche e neuy Tramlinie baue,
denn chasch zum dusse ychauffe besser abhaue.

Är meint mit däm heig är gfunde - e guets Rezäpt,
zum erülle vo sym verhasste Verchehrskonzäpt.
Mit dr Verlagerig vom Verchehrschtau in Dütsche,
chame d`Basler Innerstadt vom Verchehr schütze.

Nur an Zöllner und Drämmler het är nid dänggt,
Wenn sich dr letschd no ins 8er Drämmli zwängt.
Är schaffe jo nid dört aber es würd ihm guet due,
denn hätte mir vonem sicher wiedr e Zytli rueh.

E dütsche Zollbeamte und das isch nid zum lache,
mues pro Daag mehreri hundert Stämpel mache.
Är griegt - das isch e neuy chranged in Dütschland,
anstatt wie andeeri e Tennisarm - e Schtämpelhand

.Und jetz ha ich no e Bemerkig in eigener Sach,
Dr Wessels macht weme dusse chauft so e Krach.
Är sälber goht und dass sin bigoot wohri Tatsche,
Verträg für neui Drämmli ussem Dütsche go mache,
drby hänn mir in der Schwyz sälber e Tramfabrik,
und är als Oschtschwyzer bricht däne no s`Gnigg,
und ich find dr diggscht vo däre sach isch nämmli,
jetz will är no dr Fahrplan verdichte vom 8er Drämmli
wenn de das au nid guet findsch muesses dä füüle,
wenn Du e so ein wählsch denn isches zum hüüle